HomeKrishtlindjeZëri i Krishtlindjes

Zëri i Krishtlindjes

Zëri i qiellit vjen te ne, në kohën e Krishtlindjes. Zoti nuk është larg, ai është afër dhe na flet. Çdo vit në fund të dhjetorit na kujton kalendari vetë, që Zoti ka ndërhyrë në historinë tonë, në botën tonë.
Bota e lashtë nuk e njihte Zotin. Përkundrazi turreshin pa mend pas perëndive që i sajonin vetë. Pastaj vjen Jezus Krishti, ajo fjala hyjnore që mori trajtën e njeriut. I prekshëm, konkret, dhe plotësisht real, Krishti jetoi në tokë, eci mes mëkatarëve, ai që nuk njihte asnjë mëkat, që ishte plotësisht i shenjtë.
“Sot ai nuk është këtu”, thonë disa, “sepse ne nuk e shikojmë dhe nuk e dëgjojmë, prandaj edhe nuk mund ta besojmë”.
Jo, jo, – është përgjigja jonë – E keni gabim! Po e mbyllni zemrën ndaj së vërtetës. Edhe pse trupi i Jezusit shkoi në qiell pas ringjalljes, ai është ende këtu me anë të Frymës së tij të Shenjtë. Fjala dhe vepra e tij u lanë këtu. Nuk u fshinë dhe nuk mund të fshihen. Fryma e tij vepron sot dhe zëri i Krishtit na thërret tani.
Krishti vazhdon të flasë nëpërmjet ungjillit të tij. Ato fjalë të mahnitshme që befasuan botën e atëhershme, sfidojnë edhe botën moderne. Krishti vazhdon të çlirojë nga prangat e mëkatit. Ashtu si shumë burra e gra që vuanin nën peshën e fajit gjetën një jetë të re në dritën e Krishtit para 2000 vitesh, po kështu dhe sot çdo ditë shumë shpirtra gjejnë shpëtim në emrin e tij.
Krishtin vazhdon të shpëtojë nga djalli, ata që kanë qenë të skllavëruar prej tij. Të robëruarve në trup, apo në mendje, u hapet një derë dhe dora e të ligut nuk mund t’i mbajë ata që i përgjigjen thirrjes së Shpëtimtarit, “Ejani te unë ju të gjithë të munduar!”
Krishti vazhon të prijë në rrugën e jetës ata që janë endur në rrugët e vdekjes. Frikën e gjykimit dhe të vdekjes ai e zëvëndëson me shpresën dhe paqen e tij hyjnore. Një burim ky që ai e hapi në Kalvar edhe që nuk shterron kurrë. Krishti vazhdon të mposhtë errësirën dhe të largojë gënjeshtrën që thotë se jeta nuk ka vlerë.
Krishtlindja do të thotë se jeta juaj ka vlerë aq të madhe për Perëndinë, sa ai dërgoi Birin e tij për t’ju shpëtuar. Me Frymën e Shenjtë, Krishti e mbush shpirtin e zbrazuar dhe të varfër.
Ku e shohim Krishtin sot? E shikojmë në veprat e mira të atyre që ndjekin rrugën e tij. Ku e dëgjojmë Krishtin sot? E dëgjojmë në fjalët e mira të atyre që predikojnë mesazhin e tij, madje në ndërgjegjen tuaj gjithashtu, nëse nuk e mbytni zërin e saj. Si mund ta ndiejmë Krishtin sot? E ndieni në shpirtin tuaj, duke besuar në emrin e tij të shenjtë.

Most Popular

Recent Comments