Home Mesazhi 6 Të torturuar për Krishtin

Të torturuar për Krishtin

Policia sekrete e persekutonte shumë kishën e fshehtë, sepse dallonin tek ajo të vetmen rezistencë që kishte mbetur. Ishte rezistencë shpirtërore, e cila, nëse nuk ndalohej, do të shkatërronte fuqinë e tyre ateiste. E dalluan kërcënimin ndaj tyre ashtu siç mund ta bëjë vetëm djalli.

E dinin se, nëse dikush besonte te Krishti, nuk do të ishte më njeri pa vullnet apo mendim të vetin. E dinin se mund të burgosnin trupin, por s’mund të burgosnin shpirtin e njeriut, besimin e tij te Perëndia, ndaj e luftonin shumë ashpër. Të krishterët vareshin përmbys në litarë dhe rriheshin aq ashpër saqë trupat e tyre lëkundeshin sa në një anë në tjetrën prej goditjeve.

Vendoseshin edhe në kutitë e akullit ndryshe “qelitë frigorifer”, të cilat ishin aq të ftohta, ngaqë pjesa e brendshme mbulohej nga akulli. Më hodhën në njërën prej tyre ndërsa isha veshur mjaft hollë. Mjekët e burgut vështronin përmes një të çare dhe kur dallonin simptomat e ngrirjes për vdekje, atëherë jepnin sinjalin dhe rojat hynin brenda për të na marrë e për të na ngrohur.

Sapo ngroheshim, na dërgonin përsëri në qelitë e akullta për të ngrirë. Kjo gjë përsëritej e përsëritej! Ajo çka u kanë bërë komunistët të krishterëve ia tejkalon çdo kuptimi njerëzor! Kam parë komunistët t’u shkëlqente fytyra nga gëzimi kur i torturonin besimtarët. Thërrisnin ndërsa torturonin të krishterët:
«Ne jemi djalli!»

Pamë vërtetë se komunizmi nuk vjen prej njerëzve, por prej djallit. Është një forcë shpirtërore, një forcë e ligë, dhe mund të mundet vetëm nga një forcë më e madhe shpirtërore, Fryma e Perëndisë. I kam pyetur shpesh torturuesit: «A nuk keni dhembshuri?»

Zakonisht përgjigjeshin me citime nga Lenini: «S’mund të bësh omëletë pa thyer lëvozhgën e vezës» dhe «S’mund të presësh dru pa shpërndarë ashkla». Mizoria e ateizmit është e vështirë për t’u besuar. Kur një njeri nuk beson në shpërblimin e së mirës apo dënimin e  së keqes, atëherë nuk ka arsye pse të jetë human.

Nuk e pengon asgjë të shprehë gjithë ligësinë që gjendet tek ai. Torturuesit na thoshin: «Nuk ka Perëndi, nuk ka jetë pas vdekjes, nuk ka dënim për të keqen. Mund të bëjmë çfarë të duam». Dëgjova një torturues të thoshte: «E falënderoj Zotin, të cilit nuk i besoj, që kam jetuar deri në këtë orë që të mund të shpreh të gjithë ligësinë e zemrës sime».

Mësova prej tyre. Meqenëse nuk lejonin vend për Zotin në zemrat e tyre, vendosa të mos lija aspak vend në zemrën time për Satanin. Kam dëshmuar përpara Senatit të SHBA-së. Kam përshkruar gjëra të tmerrshme, si për shembull të krishterë të lidhur në kryqe për katër ditë e katër net.

Kryqet vendoseshin në dysheme dhe të burgosur duhej të kryenin nevojat e tyre personale mbi trupat e personave të kryqëzuar. Më pas, kryqet ngriheshin përsëri dhe komunistët talleshin dhe i përbuznin: «Shikojeni Krishtin tuaj!»

Të gjitha përshkrimet biblike të ferrit dhe dhimbjet e ferrit të Dantes s’mund të krahasohen me torturat në burgjet komuniste. Në burg, oficeri politik më pyeste  ashpër: «Sa gjatë do të vazhdosh ta mbash fenë tënde të marrë?»

I thashë: «Kam parë shumë ateistë që në shtratin e vdekjes u penduan se kishin qenë të paperëndishëm, dhe i thirrën Krishtit. A mund ta imagjinoni që një i krishterë të pendohet, kur i afrohet vdekja dhe të thërrasë Marksin apo Leninin për ta shpëtuar prej besimit të tij?”

Oficeri  qeshi: «Përgjigje e zgjuar». Vazhdova: «Fakti që mund të jesh ateist kur gjithçka shkon
mirë nuk vërteton të vërtetën e ateizmit».

Kjo është dëshmia e burgosjes  katërmbëdhjetë vjecare nën diktaturën rumune të pastorit Riçard Vurmbrantit. 

Most Popular

NUK TË GËNJEN SYRI

S’të gënjen syri, jo Brenda pak sekondash syri thith gjithë ato imazhe. Si të jesh duke ecur në krah...

HALLOWEEN-I SHQIPTAR

Po t’i marrësh për bazë imazhet që përzgjedh media, të krijohet ideja se Halloween-i na qenka festa e horrorit! Edhe pse mbrëmjet...

12 SHENJA KUNDËR HOROSKOPIT

Kur vjen puna te horoskopi, ç’parashikime ka një gazetë nuk e ka tjetra. Të krijon një pikëpyetje apo jo?Shkenca nuk ka...

S’KA HAJDUT NË PARAJSË

Në çdo fshat, në çdo lagje, në çdo pallat, dhe në çdo ndërmarrje, ka njerëz që vjedhin. Disa i kryejnë vjedhjet me...

Recent Comments