Home Jashtë Kategorie TË LUMTË DORA E VOGËL

TË LUMTË DORA E VOGËL

Shpresojmë t’i shikojmë fëmijët së shpejti të ulur në bangat e shkollave, dhe ata nxënës që hyjnë në klasën e parë të mirëpriten nga një mësuese e dashur, e cila di t’i motivojë me ndonjë YLL në fletore ose me frazën e mirënjohur “Të lumtë dora e vogël!”
Pikërisht për atë ‘dorën e vogël’ po mendoja këto ditë. A nuk është dora një nga dhuratat më fantastike që Zoti i ka dhënë njeriut? Përveç të shkruarit, ka gjë që nuk e bën dora?
Ajo dorë të fërkon sytë në mëngjes, ajo të ngre nga krevati. Ajo dorë që të gatuan, ajo edhe të ushqen. E pasi të ka larë, e të ka veshur, ajo të hap derën që të dalësh nga shtëpia, e të pararend në çdo gjë që ti bën, duke dirigjuar kush e di sa shumë sende e paisje gjatë ditës tënde.
E njëjta dorë që kap pesha të rënda, kap dhe penën e artistit. E njëjta që nget biçikletën, nget dhe varkën. Ajo dorë që luan topin e volejbollit, luan për bukuri edhe në piano. E pavarësisht zanatit: kuzhinier, mekanik, zdrukthar apo kirurg; po se je i mirë në atë që bën, jo rastësisht lavdërohesh me fjalën identitike: “Dorartë!”
Dora thur, lan, mbledh, dhuron, merr, shtyn, tërheq, e shtrëngon. Sa e shkathët është dora e njeriut! Nuk është ekzagjerim të thuash që ajo e ndërtoi botën. Ajo dorë që mëson të shkruajë në klasën e parë mund të jetë në të vërtetë vegla më unike në univers, përveç dorës së Zotit kuptohet.
Për kuriozitet, në mos për ndonjë arsye tjetër, ia vlen ta dish që dora e majmunit nuk ka të krahasuar me dorën e njeriut. Gishtat e njeriut janë më fleksibël dhe kanë aftësi më precize sesa ato të majmunit, dhe dora në përgjithësi është në gjendje të rrotullohet më mirë sesa ajo e primatëve. Edhe fakti që gishti i madh i dorës është projektuar të qëndrojë përballë gishtave të tjerë është shumë e rëndësishme, ashtu sikurse gjatësia e tij në raport me gishtat e tjera e bën shumë të lehtë që maja e çdo gishti të përputhet në mënyrë të saktë me majën e gishtit të madh. Kjo e lejon dorën e njeriut të manipulojë sende të imëta me përpikmëri. Ka edhe detaje të tjera që i japin epërsi dorës së njeriut, por vetëm në një gjë nuk ia marrim majmunit: në aftësinë e dorës së tij për të mbërthyer degët e pemëve! E pikërisht për këtë iu dizenjuar dora “kushëririt”, apo jo?!
Pa dyshim që mund të përdoret dora për keq. Sepse ajo dorë që bën gjithë ato veprime fisnike mund të bëjë edhe të kundërtat. Por të mos shkojmë aty! Le të thellohemi më mirë mbi funksionet pozitive të dorës, ndërsa përsa i përket së mirës a së keqes, ajo është në dorën tënde…
Dora jo vetëm që punon gjithë ato punë të ndryshme, por edhe përshëndet, edhe flet. E imagjinon dot një shqiptar që nuk flet me duar? Po për prekjen e dorës së nënës çfarë ngelet për të mos thënë? Ndërkohë kush e di sa herë që të ka shpëtuar dora jote kur ishe duke rënë? Edhe, a nuk të ka ndihmuar dora ta shikosh rrugën kur je në errësirë? Patjetër që po! Mund të mos jua zërë dora për çdo gjë, por prapë, dorën e ke të bekuar.
Nëse ke lindur me një dorë je me fat. Nëse ke dy duar, je dyfish i bekuar. Prandaj, pse të mos marrësh një çast sonte t’i studiosh duart e tua? Mbylle telefonin dhe studioji pak. Mos të të duket ushtrim fëminor. Ktheje dorën para dhe mbrapa. Pse jo, t’i lëvizësh edhe gishtat! Pastaj, kur në shpirtin tënd të fillojë të gurgullojë ndjesia e mrekullimit për shkak të dorës tënde, puthe dorën po deshe se e meriton! Por në fillim, puthe Zotin me një lutje falenderimi.
Duke folur për dorën, s’mund të rri pa thënë një fjalë për dorën e më të mirit që ka jetuar ndonjëherë, Jezui nga Nazareti. Është më shumë sesa domethenëse mënyra se si dora e tij prekte me mirësi njerëzit e vuajtuar kudo që ai shkonte, duke i shëruar, duke i bekuar, duke i ngritur përsëri në këmbë. E pastaj, kur mendon se si përfunduan ato duar të shenjta… të shpuara me gozhda hekuri për fajet e botës, është mbresëlënëse. Nuk e dimë si shëmbëllejnë duart e Jezusit sot në qiell, por e dimë që ai vepron ende në tokë përmes dorës së atij, apo të saj, që jeton me frymën e Tij në jetën e vet.
E fundit fare: Mos e lini në dorë të fatit atë që Zoti ka vënë në dorën tuaj! Prandaj, qofshin duart e tua të arta! Qofshin të pastra nga fajet, por të pista prej punëve të mira.

Most Popular

HALLOWEEN-I SHQIPTAR

Po t’i marrësh për bazë imazhet që përzgjedh media, të krijohet ideja se Halloween-i na qenka festa e horrorit! Edhe pse mbrëmjet...

12 SHENJA KUNDËR HOROSKOPIT

Kur vjen puna te horoskopi, ç’parashikime ka një gazetë nuk e ka tjetra. Të krijon një pikëpyetje apo jo?Shkenca nuk ka...

S’KA HAJDUT NË PARAJSË

Në çdo fshat, në çdo lagje, në çdo pallat, dhe në çdo ndërmarrje, ka njerëz që vjedhin. Disa i kryejnë vjedhjet me...

NJË ZË NGA QIELLI

Këto ditët e para të shkollës, dëgjova një mësues që ankohej që i ngjirej zëri, se duke dashur të dëgjohej përmes maskës,...

Recent Comments