Home Aktualitet S’KA HAJDUT NË PARAJSË

S’KA HAJDUT NË PARAJSË

Në çdo fshat, në çdo lagje, në çdo pallat, dhe në çdo ndërmarrje, ka njerëz që vjedhin. Disa i kryejnë vjedhjet me dhunë, të tjerë me shantazh, por shumica vjedhin fshehurazi, me marifet. Ka vjedhës ordinerë, që vjedhin ç’u del para: rroba, biçikleta, telefona, xhepa. Ka vjedhës special që vjedhin me plan, duke piketuar me kujdes prenë e radhës. Ka që vjedhin në bashkëpunim, e të tjerë vjedhin gjithmonë solo.

Edhe pse kur e dëgjon fjalën hajdut, të vijnë në mendje format më flagrante të vjedhjes, mendoni pak mbi këto pyetje:

S’ka dyshim se menaxheri që nuk i jep hakun punëtorit i vjedh djersën, po ai që merr materialet e punës pa leje si quhet?

Ai që shet një mall me hile është vjedhës apo jo? Po blerësi që ia kthen mallin kompanisë, pasi e ka dëmtuar vetë, çfarë bën?

Nuk ngurrojmë t’i drejtojmë gishtin vajzës që paguan një bluzë ndërsa ka vënë një tjetër në çantë. Po llogaritari që magazinon mangët sasinë e furnizimit, çfarë quhet?

Mirë bujku që i skuq me marifet domatet, po ai që e shet një veturë pa treguar defeket e saj çfarë është?

Lë shije të hidhur ustai që merr lekët e nuk mbaron punën, po klienti që thotë se do t’i sjellë lekët më vonë, dhe s’i bie kurrë?

Dhe, a s’është vjedhës ai që merr para borxh, kur s’ka ndërmend t’i kthejë fare?

E dimë ç’emër t’i vëmë arkëtares që ngatërron kastile llogarinë, por po zyrtari që ekzagjeron shpenzimet e dietës, si quhet?

A s’është vjedhës ai që përdor uniformën e ligjit për të fituar lekë padrejtësisht? Patjetër! Po çfarë të themi për nëpunësin e shtetit që e ‘humb’ laptopin e punës se i duhet vajzës? Apo shefja e departamentit që përditëson pajisjet e zyrës e gjoja i hedh poshtë të vjetrat? Apo shefi që shton listën e punonjësve në mënyrë fiktive?

Mirë këta që vjedhin shtetin, po fshatari që vjel për vete ullinjtë e bashkëfshatarit? Apo komshiu që merr hua shkallën e nuk e kthen? Apo shoferi që naftën e makinës së punës e djeg në makinën e tij personale? Apo turistja që përlau peshqirin e hotelit kur iku? Si quhen këta?

Po për administratorin e fondit të bamirësisë që ngeli duke drekuar shtrenjtë, ç’mund të themi?

E të mos harrojmë atë që kalon në dorë me vetëdije sende të vjedhura. Ai nuk është pa faj. Rrënja thahet, nëse nuk vaditet. Kështu që nuk do të kishte kaq shumë vjedhje në botë, po të mos kishte kaq shumë blerës për mallin e vjedhur.

Arsyeja e zakonshme përse vidhet është lakmia. Lakmuesi, duke mos patur besim te Zoti, kërkon të plotësojë dëshirat e tij në mënyrë të paskrupullt. Dikush mund të presë që njerëz të vafër e të pashkollë të bien në vjedhje. Por çuditërisht, më shumë vjedhin ata që janë të kamur, madje edhe të shkolluar. Si shpjegohet? Sepse lakmia nuk është një mëkat që i ngjitet vetëm shtresës së vafër. Djalli di t’i tundojë njerëzit e të gjitha niveleve. Dhe po pati sukses me shtresën e lartë, ai i shndërron nga lakmues, në njerëz të babëzitur që kurrë nuk ngopen.

Disa nga justifikimet e vjedhjes janë qesharake:

“Të gjithë vjedhin” thonë.

“Po s’e mora unë, do ta marrë një tjetër”.

“Edhe mua më ka vjedhur tjetërkush, prandaj dhe vjedh” shpjegon.

Ose kjo: “Nuk quhet vjedhje, kur ia merr njeriut të keq”.

Apo e bukura, “Kjo vetëm e shtetit ishte”.

Përveç lakmisë, ka që vjedhin për të shitur mend apo për shkak të presionit shoqëror. Ka që vjedhin thjesht për inat. Por duhet pranuar që ka edhe njerëz që vjedhin nga dëshpërimi, se kanë rënë në lak. Ndoshta kanë borxhe. Ndoshta kanë një krizë shëndetësore në familje dhe u duhen lekë. Një shkak i tillë, nuk e justifikon vjedhjen, por e bën më të kuptueshme të paktën. Se mos mendoni që të gjitha vjedhjet janë njësoj në sytë e Perëndisë. 

Sigurisht që është ndryshe të përfitosh padrejtësisht nga ai që ka, dhe ndryshe t’ia marrësh të vafërit apo të shfrytëzosh fatkeqësinë e tjetrit për qëllime personale. Edhe pse Zoti është kundër vjedhjes në përgjithësi, Ligji i Perëndisë e dënon në mënyrë të veçantë atë që u vjedh atyre që s’kanë fuqi të kundërshtojnë. Këta rrezikojnë të marrin mallkimin e Zotit edhe në këtë botë edhe në atë tjetrën, nëse nuk heqin dorë nga rruga ku kanë hyrë. Sepse asnjë vjedhje nuk shpëton pa u vënë re nga ai që krijoi njeriun. Ç’kujtuat pra, se ai që krijoi syrin, nuk shikon?

E di që disa thonë që nuk besojnë te Zoti, e si rrjedhojë mendojnë që nuk ka një ditë gjykimi, por atëherë, më thoni dot përse ju bren ndërgjegja? Ndërsa, shumë të tjerë e gënjejnë veten me mendimin se mund të blejnë Zotin, ashtu sikurse kanë korruptuar mbrojtësit e ligjeve tokësore. Por është marrëzi të mendosh se me një bamirësi këtu e një bamirësi aty, do t’i hedhësh hi syve të Perëndisë.

Më të mashtruar akoma janë ata që shkojnë në vende të shenjta për të hedhur lekë, me mendimin se do t’u shkojë mbarë. Nëse polici i ndershëm ofendohet kur i ofrojnë rryshfete, ç’kujtoni se mendon Zoti i shenjtë për ta? Nuk e kuptojnë që s’po arrijnë gjë tjetër, veçse të grumbullojnë faj mbi faj?

Edhe ata që thonë se do të më falë Zot se është i mirë, e kanë ngatërruar Më të Madhin, me babagjyshin e Vitit të Ri. Po nuk u penduan, s’kanë gjë në vijë.

Bibla flet për parajsën jo me një tablo bosh. Por me imazhe të spikatura. Në faqet e fundit të librit të shenjtë parajsa zbulohet si një vend i bukur e i shenjtë, ku Zoti qëndron me popullin e tij. Aty s’ka dhimbje, as padrejtësi. Por thuhet qartë që në vendin e Zotit nuk hyn çdokush. E midis kategorive të njerëzve që nuk u lejohet të hyjnë në paqen e Perëndisë, janë pikërisht vjedhësit.

Bibla e thotë shqip: “Mos u gënjeni, vjedhësit nuk do të trashëgojnë mbretërinë e Perëndisë”.

Sado pak besim që ke te Zoti, kjo duhet të të bëjë të ndalësh, e të kontrollosh gjendjen tënde shpirtërore. Lejoi vetes të përballesh me pyetjen: A jam duke vjedhur sot? A kam vjedhur më parë? Se pse ndodh diçka e çuditshme kur flitet për vjedhjen... të shkon në mendje më kollaj jo çfarë ke vjedhur, por çfarë kanë vjedhur. Kjo nuk është shenjë e mirë. Ndërkohë duhet të shqetësohesh më shumë për mëkatin tënd sesa të të tjerëve.

Prandaj, ti që i vë gishtin tjetrit, nuk ke vjedhur vetë? E ti që justifikohesh dukë thënë që ke vjedhur vetëm pak, a nuk sheh se do të kishe vjedhur shumë më tepër, por të të jepej mundësia?

Ndërsa tani, si mund të bekojë Zoti jetën tënde, kur në shtëpi ke sende të vjedhura? E si mund t’i afroshesh Zotit, kur në xhepin tënd ke fitimin e pandershëm? E si mund të hysh në parajsë, kur shpirti yt është rënduar nga vjedhje? E si mund të thuash që të ka shpëtuar Jezus Krishti, kur je duke jetuar ende në mëkat?

A e kthen dot atë që ke vjedhur? Duke besuar te Zoti, kush e di çfarë mund të arrish të bësh. Ndoshta po të jepet një shans për t’i rregulluar gjërat që nuk duhet humbur.

Ndofta nuk je fajtor për vjedhjen. Ka edhe njerëz që nuk kanë vjedhur asnjëherë. Kjo është vërtet e admirueshme. Por mos vallë e ke zili atë që është pasuruar nëpërmjet vjedhjes? Mos ndoshta do të doje të këmbeje situatën tënde me atë të padrejtin? Me atë hajdutin? Por ai që e shet shpirtin për 5 pare të qelbura, si Juda Iskarioti, s’është për t’u patur zili.

Nga kjo botë nuk do të marrësh asnjë lek me vete. As edhe një. Faraoni u varros me thesare. Por ndërsa shpirti i tij shkoi në atë botë, thesaret ngelën në tokë dhe i morën të tjerët. Ti e di këtë. Përse shqetësohesh kaq shumë atëherë? Të takon të besosh te Zoti dhe të ecësh në rrugën e tij. Dhe nëse ai besim që ti përjeton është real, ti e di ku qëndron pasuria e vërtetë, e nuk do ta ndryshosh për asgjë në këtë botë. E nëse ka njerëz që e duan gjënë e vjedhur më shumë sesa e duan Zotin, më shumë sesa parajsën, kjo s’ka përse t’ju prishë mendjen juve.

Në një shoqëri normale, ai që vjedh do të përbuzej e do të shihej me turp. Por ne nuk jemi pjesë e një shoqërie normale. Megjithatë, kjo nuk e ndryshon të vërtetën e Perëndisë.

Qoftë Krishti pasuria juaj! Qoftë parajsa fati juaj! Por ta dini se në qiell nuk hyn asnjë hajdut.

Most Popular

ZOTI I FLET TË SËMURIT

Herët a vonë, çdo njeri sëmuret. Pavarësisht ku jeton në botë, apo në ç’grup shoqëror bën pjesë, është e pashmangshme që do...

NUK TË GËNJEN SYRI

S’të gënjen syri, jo Brenda pak sekondash syri thith gjithë ato imazhe. Si të jesh duke ecur në krah...

HALLOWEEN-I SHQIPTAR

Po t’i marrësh për bazë imazhet që përzgjedh media, të krijohet ideja se Halloween-i na qenka festa e horrorit! Edhe pse mbrëmjet...

12 SHENJA KUNDËR HOROSKOPIT

Kur vjen puna te horoskopi, ç’parashikime ka një gazetë nuk e ka tjetra. Të krijon një pikëpyetje apo jo?Shkenca nuk ka...

Recent Comments