Home Jashtë Kategorie SHTATË MËKATE QË E GJUNJËZUAN BOTËN

SHTATË MËKATE QË E GJUNJËZUAN BOTËN

Koronavirusi. A është një gjykim nga Zoti? Të jeni të qartë, po të dojë Zoti, në dorë na ka. E Tija është toka, e Tija është fuqia. Nëse Zoti dëshiron të na ndëshkojë, kush i’a ndal dorën? E megjithatë, le të kemi kujdes në ato që themi, le të mos nxitojmë të themi se çfarë është apo nuk është gjykim prej Perëndisë. Mirë është ta nisim hetimin një herë, si të thuash, më afër shtëpisë… Sepse ekzistojnë shtatë mëkate që janë direkt fajtorë për pandeminë që ka zënë botën sot.

1. Fajin e ka grykësia!

Shumë njerëz kanë krijuar një ide të gabuar për kuzhinën e lindjes, sikur për shkak të vafërisë aty hahet çdo gjë. Në fakt, e kundërta është e vërtetë, sepse janë blerësit e kamur që adhurojnë ushqimet ekzotike. Duke harruar që njeriu duhet të hajë për të jetuar e jo të jetojë për të ngrënë, këta ecin me filozofinë që goja duhet t’i provojë të gjitha! E kanë bërë barkun e tyre perëndi, e kështu vunë dorë pikërisht mbi ato kafshë të egra që janë mbartëse të sëmundjeve siç është SARS-i dhe koronavirusi i ri. Ekzistojnë prova mjaft bindëse që këto viruse e kanë origjinën te lakuriqët e natës dhe gjurmët më të dukshme na çojnë te tregu i gjësë së gjallë në Wuhan…

Ndoshta ju duket gabim t’i tregojmë me gisht ata që kanë rrezikur shëndetin e miliona njerëzve për të kënaqur oreksin. Mua jo. Por ama, të mos harrojmë që këta s’janë të vetmit njerëz në botë që i shkaktojnë telashe të tjerëve, vetëm e vetëm për të kënaqur shijen personale. Filozofia “kështu më pëlqen” vazhdon t’i sjellë shoqërisë dëme të mëdha. Prandaj, si i përgjigjesh ti pyetjes: A ke shkelur mbi kurrizin e të tjerëve për të plotësuar dëshirat e tua personale? Apo e ke kthyer edhe ti kënaqësinë tënde personale në idhull? Sepse kur fillojmë t’i vëmë emrin mëkatit siç e meriton, le të mos harrojmë mëkatin tonë.

2. Fajin e ka fodullëku!

Në lindje, çështjen e statusit e kanë pikë të dobët. E mos mendo që mund të tregosh që je “dikushi” po nuk dite të qerasësh të tjerët! Dhe për të fituar pikë më shumë, duhet të blesh mishra të egra. Përse? Një arsye është se ato janë më të rrallat edhe normalisht më të shtrenjtat.

Por siç e dimë, na ka dalë një kleçkë e vogël. Ato kafshë të egra nuk kanë vetëm dhëmbë. Ato janë dhe mbartës të viruseve tepër të rrezikshme për njeriun. Imagjinoni tani, që e gjithë bota ra në krizë sepse dikush donte t’i shiste mend dikujt!

Sa mirë që këtej, nuk e kemi këtë lloj vesi që kanë këta! Edhe ne nuk vuajmë nga ato komplekse se si të dukemi mirë në sytë e të tjerëve. Nuk i harxhojmë paratë kot duke qerasur njëri-tjetrin. Sidomos në dasma jo. Dhe ku kemi nge të shesim mend neve?! Jemi të urtë. Kemi norma. Jemi me Zotin. Jemi më të civilizuar, apo jo?

Prit pak… mos vallë edhe ti i ke bërë qejfin vetes, ndërsa Perëndinë e ke harruar? Nëse po, çfarë po pret? Të erdhi rradha të hash bukën e përuljes. Apo nuk ke frikë Zotin?

3. Fajin e ka besëtytnia!

Nga kapërceu virusi te njeriu? Duke lënë mënjanë teoritë konspirative (që janë një virus në vetvete) shkenca dyshon për një kafshë mbartëse me emrin pangolini.

Pangolini është një kafshë e egër, por e urtë. Ai lëviz natën, është i këndshëm, nuk të sulmon, dhe kur e sulmojnë rrotullohet në vetvete duke shpresuar që luspat e tij do ta mbrojnë nga i keqi. Por del që i keqi është njeriu, që e gjuan pangolinin pikërisht për t’i marrë ato luspa. Kjo kafshë mbrohet me ligj, gjoja, por njeriu është i paskrupullt, dhe po e çon drejt zhdukjes. Shkaku? Besëtytnia. Sepse luspat e pangolinit janë një nga përbërësit kryesorë të shumë ilaçave popullore në mjekësinë tradicionale kineze.

A thashë mjekësinë tradicionale?! Mjekësi i thënshin! Mjekësia popullore kineze nuk është gjë veçse një mishmash gojëdhënash, supersticionesh, një grumbull llafollogjish, e një pseudoshkencë e pashoqe. Çudia më e madhe nuk është që lulëzon në vendet aziatike, por që edhe në botën perëndimore ajo ka fituar shumë ndjekës gjithashtu.

Nuk e keni idenë sesa i fortë është ndikimi i besëtytnisë në Kinë. Pavarësisht propagandës komuniste, që prej 70 vitesh kërkon t’i bëjë popullit shpërlarje truri me pikëpamjet shkenco-ateiste, një pjesë e madhe e shoqërisë vazhdon të ndjekë traditat popullore pagane. Sepse fati i popullit që s’beson te Zoti, nuk është të shkojë drejt civilizimit, por të përfundojë duke besuar në sajesa të shëmtuara.

Atëherë i kujt është faji? E ka fajin besëtytnia! Ne e taksëm për mirë, por besëtytnia na hëngri në pabesi! Kështu ndodh kur njerëzimi beson në djaj.

4. Fajin e ka lakmia!

Përse në tregun e Wuhan-it po shisnin kafshë të egra? Disa gjoja të mbrojtura me ligj. Përgjigja dihet. Se ishte fitimprurëse. E fitimi vinte jo vetëm nga mishi i këtyre kafshëve të egra, por akoma më shumë prej pjesëve të tjera të trupit që i duheshin patjetër dyqaneve të mjekësisë popullore, treg që kap një vlerë prej miliarda dollarësh!

Bibla godet në shenjë: “Lakmia për para është rrënja e gjithë të këqijave”

Çfarë e shtyu fshatarin të kapë gjërat e ndaluara prej të cilave ka dalë koronavirusi? E tregtari t’i shiste, e nënpunësi i shtetit të heshtte, e mjeku popullor t’i ngrohte duart? Një zinxhir i gjatë njerëzish të lidhur bashkë prej lakmisë. Por fitimi i tyre ka ardhur në dëm të të gjithë botës.

Do të thuash që këta nuk e dinin që kjo punë ishte me kaq zarar. Vërtet nuk e dinin?! Përse, mos është hera e parë që ndodh kjo? Por lakmia të verbon për të mos parë të keqen që i bën tjetrit, e vetëm do që të gllabëroje e të gllabërojë.

Por përpara se të zemërohesh shumë me tregtarin e Wuhan-it, shiko pak veten në pasqyrë. Dhe kujtoni çfarë tha Jezus Krishti: “Ai që është i pa mëkat, le të gjuaj i pari me gurë”. Kur flitet për lakminë, këtu ka vend për pendim nga të gjithë. Se gjurmët e lakmisë shkojnë në të gjithë botën.

Virusin do ta ndalojnë një ditë, por lakminë kush e ndalon? Kini kujdes nga koronavirusi! Por ruani veten me shumë nga lakmia! E para të rrezikon shëndetin. E dyta të merr shpirtin.

5. Fajin e ka papastërtia!

Parullën e larjes së duarve e morëm vesh të gjithë. Pastërtia në këto kohë mund të të shpëtojë jetën, ose jetën e atyre me të cilët je në kontakt. Madje papastërtia mund të jetë një nga shkaqet kryesore për fillimin e gjithë kësaj tragjedie të madhe…

I keni parë pamjet e tregjeve të mishit në disa nga vendet lindore? Se sa të papastra janë? E mënyra si i vendosin kafshët e të gjitha llojeve bashkë, ca të buta e ca të egra, e ca të gjalla e ca të therura? Kafazë të vendosur rrëmujë, njëri mbi tjetrin në ambiente që shpesh herë janë të mbushura me pisllëqe. Virologët kishin vite që thoshin që është një bombë biologjike me sahat. Fjalë që ranë në vesh të shurdhët!

Nuk është vetëm shkenca që nuk u dëgjua. S’ia vënë veshin fjalës së Perëndisë gjithashtu. Keni menduar ndonjëherë përse Ligji i Zotit ndalonte ngrënien e disa lloj kafshëve duke i quajtur ato të papastra? A nuk ishte për arsyen se ato lloj kafshësh të egra mund të jenë mbartëse të sëmundjeve? Por njeriut i duket vetja më i mençur se Bibla.

Edhe pse mund të mos e kemi të ndaluar ngrënien e disa lloje mishërash siç iu ndalua popullit të Izraelit, prapë se prapë duhet të kuptojmë që Ligji i Zotit na jep disa parime të pandryshueshme, siç është kujdesi që duhet të tregojmë kur merremi me kafshë të egra. Vlerat e pastërtisë janë vlera të përhershme, apo jo? I referohemi jo vetëm pastërtisë fizike, por edhe asaj shpirtërore. Shumë mirë që i pastroni duart, por shpirtin kush jua lan?

6. Fajin e ka gënjeshtra!

Në datën 30 dhjetor Dr. Li Wenliang, i postoi kolegëve një paralajmërim për shfaqjen e një virusi të ri të tipit SARS. Iniciativa e tij u shpërblye me një investigim policor. Mjeku në fjalë u akuzua për thyerje të ligjit, se gjoja kishte përhapur “informacione të rreme”, dhe nën kërcënimin e ndjekjes penale u detyrua të nënshkruante një dokument ku shprehej i penduar për çfarë kishte bërë e duke premtuar që nuk do të fliste më me të tjerët. Nuk ishte i vetmi. E dimë që të paktën tetë mjekë të tjerë u sanksionuan në këtë mënyrë.

Ligji i Zotit na porosit, “Mos bëni dëshmi të rreme”, por autoritetet në Wuhan çfare bënë? Jo vetëm që gënjyen por i detyruan edhe mjekët të gënjenin gjithashtu. Kësaj i thonë mëkat. Sa ndryshe do të ishte bota sot po të mos gënjenin njerëzit?

Kur më në fund autoritetet në Wuhan e pranuan që ishte shfaqur një virus i ri, menjëherë deklaruan që nuk kishte të dhëna që ajo ishte ngjitëse, dmth nga njeriu te njeriu. Mesazhi i tyre ishte ‘rrini të qetë se e kemi situatën nën kontroll’, të paktën deri në momentin që dominotë filluan të binin gjithandej. Sa ndryshe do të ishte bota po të besohej e vërteta? Qoftë edhe kur ajo është e pakëndshme.

Kë besoni ju? A jeni nga ata që e besoni të vërtetën apo gënjeshtrën? Kush është e vërteta sipas teje? A ka më të besuëshëm sesa Jezus Krishti? Apo mos vallë je nga ata që mendon se je vetë i vërteti?

7. Fajin e ka neglizhenca!

Jemi në vitin 2020. Jemi në mes të pademisë. Me gjithë përvojën tonë shkencore e mjekësore, e me gjithë eksperiencën që bota ka fituar përgjatë viteve duke luftuar viruse, si është e mundur që përfunduam në situatën ku jemi sot? Përse nuk u veprua më mirë? E përse s’u morën masat më shpejt? Cila është përgjigja? NEGLIZHENCA.

Pekini i mbyll sytë ndaj rrezikut. Shteti i atyshëm, në vend që të kufizonte shfrytëzimin e kafshëve të egra, e nxiti më shumë. Por në dritën e asaj që ndodhi me SARS-in në vitin 2003 (që filloi pikërisht në një treg për mishin e gjallë) dhe në dritën e kalimit të viruseve të tjera nga kafshët, duhet të kishin qenë më të vëmendshëm. Dhe nuk ishte vetëm Pekini që s’e pati mendjen. As drejtuesit e shteteve të tjera nuk i mbajtën sytë hapur. Kishte kohë që binte alarmi si për rrezikun, edhe për nevojën e një niveli më të lartë përgatitje ndaj tij. Por mbani mend porosinë e Biblës: “Ai, pra, që di të bëjë të mirën edhe nuk e bën, bën mëkat.”

Pasi të ketë kaluar kjo krizë, ndoshta kësaj radhe do të zëmë mend apo jo? Mos u tregoni naivë. Siç nuk mëson kollaj nga gabimet e tij njeriu, ashtu janë edhe shtetet, se ato veçse pasqyrojnë natyrën njerëzore. Aq më tepër kur është interesi në mes.

KONKLUZIONI

Kush pra, e ka fajin që bota po rrezikohet nga një virus i ri? Mos e fajësoni natyrën. Pse, natyra e ka fajin që dikush e vuri dorën atje ku nuk duhet?! Dhe kujdes para se të akuzosh Perëndinë. Përse? Zoti na tha që të luajmë me zjarrin?!

Ndërkohë, kemi parë që janë shtatë mëkate reale që na sollën në gjendjen ku jemi. I kemi rreshtuar njëra pas tjetrës. Ato janë: grykësia, fodullëku, bestytnia, lakmia, papastërtia, gënjeshtra dhe neglizhenca. Nëse je shok me ta, erdhi dita të mendohesh mirë. Kush i beson Zotit përqafon virtytet e tij dhe zbulon shkallën që të ngjit lart, deri në qiell. Por ai që e lidh fatin e tij me mëkatet e lartpërmendura, do të zbulojë që ato formojnë një shkallë gjithashtu. Por ajo është një shkallë që të çon poshtë e poshtë deri sa zbret në ferr.

E largoftë Zoti të keqen prej jush dhe ju sjelltë në rrugën e shpëtimit!

Most Popular

ZOTI I FLET TË SËMURIT

Herët a vonë, çdo njeri sëmuret. Pavarësisht ku jeton në botë, apo në ç’grup shoqëror bën pjesë, është e pashmangshme që do...

NUK TË GËNJEN SYRI

S’të gënjen syri, jo Brenda pak sekondash syri thith gjithë ato imazhe. Si të jesh duke ecur në krah...

HALLOWEEN-I SHQIPTAR

Po t’i marrësh për bazë imazhet që përzgjedh media, të krijohet ideja se Halloween-i na qenka festa e horrorit! Edhe pse mbrëmjet...

12 SHENJA KUNDËR HOROSKOPIT

Kur vjen puna te horoskopi, ç’parashikime ka një gazetë nuk e ka tjetra. Të krijon një pikëpyetje apo jo?Shkenca nuk ka...

Recent Comments