SHËN SOFIA

Dy fjalë. Një fjalë drejtuar atyre që do të shkojnë të falen te Hagia Sofia ditën e premte. Edhe një tjetër drejtuar atyre që kritikojnë ata që shkojnë të luten te Hagia Sophia….

PËRSE DUHET TË SHKONI TË KRYENI RITIN TUAJ TË LUTJES PIKËRISHT ATY? A mendoni që do të jeni më afër Zotit po t’i luteni në atë vend sesa në vendet ku jeni lutur gjatë gjithë jetës suaj? Apo do të merrni një bekim më të madh se faljen e bëtë atje? Thua që vlerësohen më shumë lutjet që shqiptohen brenda asaj godine të vjetër? Mos vallë Hagia Sofia i ka gurët të shenjtë? Apo ndoshta ajo është ngritur mbi ndonjë tokë të shenjtë?

Më duhet të rrëfej që unë po dyshoj në sinqeritetin tuaj. Ndoshta e kam gabim, dhe e di që vetëm Zoti mund të shikojë brenda zemrës së njeriut, por ia vlen t’i bëni vetes disa pyetje ndërsa shkoni të bëni ritin tuaj fetar.

A i faleni vërtet Zotit apo adhuroni historinë tuaj, pushtetin tuaj, veten tuaj? A ka një frymë përulësie në lutjen tuaj, apo ju duket vetja më superiorë se njerëzit e tjerë? Dhe më duket me vend të pyesni veten nëse kërkoni sinqerisht vullnetin e Perëndisë apo thjesht realizimin e dëshirave tuaja tokësore.

PËRSE MËRZITENI KAQ SHUMË QË DISA NJERËZ DO TË KRYEJNË RITIN E TYRE TË LUTJES NË KËTË GODINË HISTORIKE? Juve, a ju dëmton kjo gjë? Ju prish punë? Dua të kuptoj nga se buron pezmatimi juaj? Vjen ngaqë jeni të zellshëm për laicitetin e muzeumit apo ju duket se po përdhoset ish-bazilika e krishterë? Se vetëkuptohet që këto janë dy gjëra krejt të ndryshme.

Nëse bëni pjesë në grupin e parë, më bëni përshtypje me ato deklaratat tuaja sikur qenka sakrilegj që muzeumi të ketë funksion fetar. A nuk e dini që ngjani disi qesharakë me këto pretendime? Apo kujtoni që i vetmi kult që mund të ngrihet në Hagia Sofia është ai i historisë njerëzore? Mos harroni që kjo godinë u ndërtua për lavdinë e Zotit, jo të njeriut.

Po qe se bëni pjesë në grupin e dytë, di t’ju flas ndryshe. Si i krishteri të krishterit.

Edhe pse besimi ynë është feja më e madhe në botë, edhe pse ungjlli i Jezu Krishtit ka shkuar në të katër anët e botës, le të konstatojmë diçka të rendësishme që ka ngjarë gjatë shekujve që nuk mund të mohohet: Zoti ka lejuar që të gjitha qendrat më të hershme të krishterimit të gjymtohen. A keni menduar ndonjëherë pse?

Tempulli i Jeruzalemit u shkatërrua që në shekullin e parë, Roma u plaçkit nga barbarët disa herë në shekullin e pestë (përfshi disa nga kishat), e Konstandinopoja me katedralen e saj të famshme ra në dorë të osmanëve në vitin 1453.

Edhe sikur Krishti të mos kishte thënë hapur që “ky tempull do të shkatërrohet” vetë ngjarjet historike do të na kishin shtyrë të dyshonim për pasjen apo mospasjen e një tempulli fizik. Gjithsesi, të thuash që mësimi i Dhiatës së Re është i qartë në këtë pikë, nuk e përcjell mjaftueshëm frymën radikale të veprës së Krishtit, i cili hapi një rrugë të re drejt Perëndisë që nuk varet nga objekte tokësore.

Kush e di sa shokuese për dëgjuesit e tij judeas ishte deklarata, “Unë po ju them se këtu është një më i madh se tempulli”? Ndërsa nuk besoj se gjen sqarim më domethënës sesa ai që Jezusi i dha gruas samaritiane me fjalët, “ora ka ardhur që ata që adhurojnë Atin ta adhurojnë në frymë dhe në të vërtetë”.

Miq të krishterë, sado që jeni të apasionuar pas historisë edhe sado që simpatizoni vlerat kulturore të një godine madhështore si Hagia Sophia, nuk mund t’i lejoni këto ndjenja t’ju mjegullojnë gjykimin tuaj frymëror.

Ungjilli e bën të qartë që s’kemi nevojë për një tempull në tokë për t’u lidhur me Zotin, se besimi ynë nuk forcohet dhe as dobësohet për shkak të një godine. Ne adhurojmë një Zot të ringjallur që qëndron në qiell dhe e gjejmë veten në praninë e tij sa herë që mblidhemi me të tjerët për ta adhuruar.

Jo më kot Jezusi tha, “Unë jam udha, e vërteta dhe jeta; askush nuk vjen tek Ati veçse nëpërmjet meje”. Kjo është siguria jonë. Ka një tempull që nuk është ndërtuar prej dorës së njeriut dhe lum ata që marrin pjesë në të.

Shumë komentues merren me aspektin politik të zhvillimeve lidhur me Shën Sofinë, ndërsa unë nuk e kam prekur fare këtë pjesë. Kam dashur të trajtoj vetëm anën shpirtërore të çështjes.

Most Popular

ZOTI I FLET TË SËMURIT

Herët a vonë, çdo njeri sëmuret. Pavarësisht ku jeton në botë, apo në ç’grup shoqëror bën pjesë, është e pashmangshme që do...

NUK TË GËNJEN SYRI

S’të gënjen syri, jo Brenda pak sekondash syri thith gjithë ato imazhe. Si të jesh duke ecur në krah...

HALLOWEEN-I SHQIPTAR

Po t’i marrësh për bazë imazhet që përzgjedh media, të krijohet ideja se Halloween-i na qenka festa e horrorit! Edhe pse mbrëmjet...

12 SHENJA KUNDËR HOROSKOPIT

Kur vjen puna te horoskopi, ç’parashikime ka një gazetë nuk e ka tjetra. Të krijon një pikëpyetje apo jo?Shkenca nuk ka...

Recent Comments