Home Aktualitet NJË ZË NGA QIELLI

NJË ZË NGA QIELLI

Këto ditët e para të shkollës, dëgjova një mësues që ankohej që i ngjirej zëri, se duke dashur të dëgjohej përmes maskës, po sforcohej në të folur. Edhe vajza ime më tregoi se i ështe acaruar fyti për të njëjtën arsye. Vetëm kur të ikën zëri, e kupton se sa e vyer është dhuntia e të folurit, apo jo?

Ndonëse asnjë prej nesh nuk ka lindur duke folur, dhe e mësuam gjatë rrugës, dihet që ky aparat fizik është stampuar me një “made in heaven”. Në fakt, kur shikon një fëmijë të sapolindur s’ta mbush syrin se do të jetë në gjendje një ditë të artikulojë mendime e ndjenja komplekse, por brenda atij trupi të vogël qëndron një nga gjërat më të sofistikuara që është krijuar ndonjëherë: zëri njerëzor. Potenciali i atij zëri është po aq i madh, sa duket për momentin aq i padobishëm, veçse për të shprehur nëpërmjet të qarat e thjeshta, atë zhurmën e pakënaqësisë që ndiejnë të gjitha bebet kur e gjejnë veten, papritur, të nxjerra jashtë rehatit ku kanë qëndruar për nëntë muaj, duke u përballur me një ndjenjë të re, që nuk e dinë si quhet tani, por në të ardhmen do ta përshkruajnë me fjalën ‘uri’.

Uria e bebes sa vjen e shtohet, jo vetëm për ushqim, por për t’u bërë pjesë e botës rreth tij. Diçka që fillon me të prekurit, e që shoqërohet shumë herët me një kureshtje të çuditshme për të përvetësuar komunikimin me zë me njerëzit përreth. Se si mëson fëmija të kuptojë jo vetëm fjalët, por edhe t’i interpretojë nuancat e tyre, e pastaj të fillojë t’i riprodhojë është një mister që i ka habitur vazhdimisht shkencëtarët. Duket që kemi të bëjmë jo vetëm me një kapacitet për të folur, por edhe me një instinkt që programohet te njeriu që në krye të herës.

Është e vërtetë që mbreti i xhunglës mund ta ketë ulërimën më të fuqishme, por tingujt e zërit njerëzor janë legjendarë. Brenda gojës përpunohet zhurma që del nga qafa e tij (relativisht e gjatë) duke prodhuar një zë që aftëson të folurit, po e po, por edhe na furnizon me të qeshurat, të qarat, të bërtiturat, pëshpëritjet e shumë mënyra të tjera e të shprehurit. Madje, aq i shkathët është zëri i njeriut, sa ai mund të imitojë gjithfarë tingujsh që lëshojnë edhe kafshët, duke përfshirë: gërhitjet, mjaullimat, lehjet, hungërimat, fryrjet e çjerrjet. Kumbimi i kafshëve mund të jetë mbreslënës, por brenda njeriut qëndron një simfoni e tërë.

Edhe pse e pagëzojmë ndonjë artist me emrin “bilbil” për shkak të zërit të embël që ai ka në të kënduar, e vërteta është që ka shumë këngëtarë që ia kalojnë edhe zogut me ëmbëlsinë e zërit të tyre. Kush është ai sytë e të cilit nuk janë mbushur me lot duke dëgjuar një solist të talentuar? Zëri i njeriut është një vegël muzikore e pashoqe.

Po duke u fokusuar mbi të folurin vini re që ka një përshtatje optimale midis aftësisë së njeriut në të shprehur dhe botës së tij të brendshme. Vendi dhe koha nuk na lejojnë të hulumtojmë shumë mbi këtë çështje, por mendoni pak se sa e thatë do të ishte e folura juaj pa gjithë ato intonacione, herë duke e holluar zërin, herë duke e trashur, tani duke folur më me shpejtësi, pastaj më ngadalë, duke alternuar edhe intensitetin, edhe ngrohtësinë sipas dëshirës, gjithçka që të lejon të pasqyrosh dhe të pasurosh shpirtin me tone që përcjellin, sipas rastit, dashurinë, zemërimin, habinë, frikën, gëzimin dhe mërzitjen.

Nuk është ekzagjerim të thuash që zëri yt është mahnitës – edhe nëse nuk shquhesh për talent në të folur! Mënyra si bashkëpunojnë diafragma e mushkëritë me laringun duke bërë që kordat vokale të vibrojnë, duke çuar te goja atë tingull që përpunohet pastaj nga një gjuhë që hedh valle lart e poshtë, duke u takuar herë me qiellzën e herë me dhëmbët, por që nuk ngelet vetëm në këto lëvizje, se edhe buzët duan të shfaqin aftësinë e tyre në këtë shfaqje orkestrale. A nuk është kjo e gjitha një bashkërenditje e mrekullueshme?

Që zëri ynë është një dhuratë qiellore, kush mund të dyshojë? Por sa ironi e trishtueshme, kur dhuntinë që na u dha për të shërbyer si urë për të shprehur botën tonë të brendshme, e shfrytëzojmë për ta mohuar Zërin që na krijoi.

Pyetjen tendencioze, “Përse Ai nuk më flet mua atëherë?” mund t’i përgjigjesha me një “Ai të flet, por ti nuk e dëgjon”, por nuk do ta bëjë këtë. Do tregohem pragmatik edhe do të rrëfej që as unë nuk e kam dëgjuar zërin e Perëndisë në atë mënyrë të drejtpërdrejtë që e nënkupton ky pyetjebërës, por kjo nuk më shqetëson, se as nuk pretendoj që Zëri i Parë duhet të plotësojë tekat e mia në këtë drejtim.

A do të thotë kjo që Zoti nuk ka folur ndonjëherë? Sigurisht që jo. Pse? Ai që ia fali zërin njeriut nuk ka zë?

Për vete, jam i bindur që Zoti ka folur disa herë gjatë historisë me një zë tepër të qartë. Disa nga ato raste kanë qenë kyçe për fatin e njerëzimit, siç është rasti kur foli në kopshtin e Edenit, apo dita që buçiste zëri i tij nga reja e lavdisë mbi malin Sinai në praninë e gjithë popullit hebre. Megjithatë, ia vlen të theksosh që edhe pse përjetimi i zërit hyjnor e trembi për vdekje popullin, prapë zemra e tyre ngeli mosbesuese. Por le të ngjitemi më mirë në atë malin tjetër ku foli Zoti, një vend që quhet mali i ullinjve, atje ku Biri i Perëndisë i predikoi turmave një mesazh sfidues por plot me hir. Populli ngeli gojëhapur. Ndonëse jetonin në një botë shumë fetare, pohuan me të drejtë që, “asnjë nuk flet si ky”.

Ndoshta ti do të doje të kishe qenë prezent dhe ta dëgjoje për vete Jezus Krishtin. Edhe pse kjo është diçka që nuk mund ta realizojmë, a e dini që shumë njerëz e kanë përjetuar zërin hyjnor përmes leximit të shkrimeve të shenjta? Prandaj, a je gati të marrësh pjesë në një eksperiment? E duke hapur Biblën te Ungjilli sipas Gjonit gjatë këtyre ditëve, e duke lexuar disa pjesë të saj, ME ZË, kush e di nëse nuk ke për të dëgjuar zërin qiellor nëpërmjet shqipërimit të fjalës së tij prej zërit tënd? Po të lutem të mos e nënvlerësosh si mundësi. Tek e fundit, çfarë ke për të humbur?

Ndërsa përsa i përket dëgjimit në mënyrë konkrete të zërit të Zotit, Jezusi tha që çdo njeri do ta dëgjojë zërin e tij një ditë. Janë me fat ata që do ta dëgjojnë zërin e shpëtimtarit kur ai t’i përshëndesë me fjalën, “Mirë se erdhe shërbëtor i mirë dhe besnik, hyr në gëzimin e Zotit tënd”. A do jesh ti midis tyre?

Most Popular

HALLOWEEN-I SHQIPTAR

Po t’i marrësh për bazë imazhet që përzgjedh media, të krijohet ideja se Halloween-i na qenka festa e horrorit! Edhe pse mbrëmjet...

12 SHENJA KUNDËR HOROSKOPIT

Kur vjen puna te horoskopi, ç’parashikime ka një gazetë nuk e ka tjetra. Të krijon një pikëpyetje apo jo?Shkenca nuk ka...

S’KA HAJDUT NË PARAJSË

Në çdo fshat, në çdo lagje, në çdo pallat, dhe në çdo ndërmarrje, ka njerëz që vjedhin. Disa i kryejnë vjedhjet me...

NJË ZË NGA QIELLI

Këto ditët e para të shkollës, dëgjova një mësues që ankohej që i ngjirej zëri, se duke dashur të dëgjohej përmes maskës,...

Recent Comments