Home Bibla Flet Sot 8 MËNYRA QË KEQPËRDORET EMRI I ZOTIT

8 MËNYRA QË KEQPËRDORET EMRI I ZOTIT

Emri ka rëndësi. Edhe pse në kohët moderne nuk ka shumë formalitete në marrëdhëniet midis njerëzve, prapë se prapë, emri ka rëndësi. Sepse kur dikush ka merita të mëdha, a nuk themi që ai ‘fitoi nam’? Ndërsa lidhur me personin që s’ka ndonjë meritë a nuk thuhet: “S’ia kam dëgjuar as emrin”?

Emri nuk është thjesht një etiketë, por ai është diçka që përfaqëson gjithë vlerën apo dinjitetin e personit. Pikërisht, për këtë arsye njeriu kërkon të mbrojë emrin e tij. Po qe se unë shpif në adresë të dikujt me emër, më hedh në gjyq, apo jo?

Prandaj, nëse për njeriun emri ka rëndësi, ç’duhet të themi lidhur me emrin e Më të Madhit?! E po qe se ti ke merak emrin tënd, që je veçse një njeri vdekatar, merre me mend sa peshë të madhe ka emri i Zotit të përjetësisë, sepse ai emër përfaqëson karakterin dhe dinjitetin e personit më të madh.

Siç mund të pritej, Bibla flet me terma lartësues për emrin e Zotit. Psalmisti thotë: “Sa i mrekullueshëm është emri yt mbi gjithë rruzullin”. E në një vend tjetër thërret “I jepni Zotit lavdinë që i përket emrit të tij”.

Edhe pse Bibla nuk të lë të harrosh rëndësinë e emrit të Zotit, bota, shoqëria e media sikur kanë shpallur sezon gjuetie kundër atij emri. Por sado që jetojmë në një kohë të mbrapshtë si kjo, ligji i Perëndisë ngelet i pandryshuar:

“Nuk do ta përdorësh emrin e Zotit kot, sepse Zoti nuk do të lërë të pandëshkuar atë që përdor kot emrin e tij”!

Porosia është e qartë, por për ta ilustruar më mirë, po ju kallëzoj disa nga mënyrat më të zakonshme që njerëzit e keqpërdorin emrin e Zotit…

E para. Kur e përdorin emrin e Zotit thjesht si pasthirrmë. Atje ku dje shpreheshin me frazat retorike “ah!, oh!, bah!” sot është bërë e modës të thonë “O Zot!” “O Perëndi!”apo të lëshojnë një “Pashë Zotin!”, kot së koti, pa e kaluar fare në mendje rëndësinë e atij emri. Kushedi sa njerëz sot janë fajtorë në këtë pikë!

E dyta. Më e turpshme akoma është kur e përfshijnë emrin e Zotit në biseda jo të shenjta. Njerëz të tillë, edhe përse e kanë emrin e Zotit në gojë, shpirtin e kanë të djallosur.

E treta. E keqpërdorin kur e trajtojnë si një emër magjik. Nesë kërkon të përdorësh emrin e Zotit si një abrakadabra për të bërë vullnetin tënd realitet, po gabon rëndë. Emri i Zotit nuk është një shkop magjik. Kush e trajton në këtë mënyrë nuk e ka kuptuar kush është Zoti.

E katërta. Duke manipuluar. Duhet të kesh dëgjuar lypësin në rrugë që përdor emrin e Zotit në këtë mënyrë. Edhe pse është e drejta e tij të kërkojë lëmoshë, nuk është e drejtë që hedh grep me emrin e Zotit. Por mos kujtoni që ai është i vetmi që bën këtë gjë. Pak faltore janë ngritur për të marrë lekë kundrejt shpresës së rreme? E pak predikues enden nëpër botë duke premtuar mrekullira në emër të Zotit, por që nuk i realizojnë dot?

E pesta. Kur betohen kot. Ka persona që për fenë interesohen shumë rrallë, por kur e do puna e mbushin gojën dhjetra herë me betimin “Për Zotin!”. Të betohesh në emrin e Zotit për të bërë të besueshme atë që nuk duhej besuar është mëkat i padiskutueshëm. Për shkak të këtij abuzimi Jezus Krishti tha: “Mos bëni be as për qiellin e as për tokën por le të jetë po-ja juaj po dhe jo-ja juaj jo”. Mos vallë e ke lidhur ti emrin e Zotit sado pak me gënjeshtrën tënde? Nëse po, atëherë po e zhyt në baltë atë që është e shenjtë dhe e pastër.

E gjashta. E keqpërdorin emrin e Zotit kur lëshojnë mallkime në emër të tij. Përse? Sepse nuk ju takon juve të shpërdani mallkimet e Perëndisë. Thjesht, nuk e ke këtë kompetencë. Prandaj, bekoni më mirë, sepse për këtë ju jepet e drejta, por për sa i përket mallkimit, I Madhi e di vetë atë punë.

E shtata. Njeriu bie në faj kur e përdor emrin e Zotit për t’u hequr si besimtar në sytë e të tjerëve, ndërkohë që ai nuk është. I ngjashëm me këtë mëkat, është mënyra se si një besimtar i vërtetë kërkon të rrisë vlerën e tij në mënyrë artificiale në sytë e besimtarëve të tjerë duke përdor jo vetëm emrin e Zotit, por një gjuhë super shpirtërore për këtë qëllim, që është e njëjta gjë. A thua që ti je plotësisht i pafajshëm në këtë pikë?

E teta. Më keq akoma janë ata që profetizojnë e predikojnë mësime të rreme në emër të Zotit. Ky është mëkat i dyfishtë. Një person i tillë, jo vetëm që mashtron, por e lidh emrin e shenjtë me gënjeshtrën. A nuk është kjo një nga shkeljet më të rënda të porosisë “Mos e përdor kot emrin e Zotit”? Fajtorët duhet t’i përgjigjen Perëndisë për një mëkat të tillë. Nesë nuk pendohen, keq e kanë.

Përveçse ndalohet përdorimi i gabuar i emrit të Zotit në këto mënyra të drejtpërdrejta, a nuk gjendet brenda udhëresës hyjnore “Nuk do ta përdorësh emrin e Zotit kot” një ndalesë mbi trajtimin jo të denjë të atyre gjërave që kanë lidhje me emrin e Zotit, siç është përdorimi i fjalëve të Biblës për qëllime jo serioze. Se i përdor për të bërë humor apo për debat koti, për të tallur apo për t’i tallur, si mund të thuash që je duke respektuar emrin e Zotit kur nuk respekton fjalën e tij? A nuk lidhet ngushtë nderi i emrit të dikujt me nderin që tregon ndaj fjalëve të tij?

Të dashur lexues, është koha të bëni një vetanalizë. A je duke u bërë armik i Perëndisë? Sepse kush e trajton lehtë emrin e Zotit, e përçmon atë. Prandaj, mos mendo që nuk ka gjë nëse e përdor kot emrin e Zotit. Mos mendo se kjo është e parëndësishme. Ligji i Zotit të ka paralajmëruar “se Zoti nuk do të lërë të pandëshkuar atë që përdor kot emrin e tij”. Është një paralajmërim i formës së prerë. Prandaj përse kërkon të provokosh Zotin?

E mos mendoni që po flas vetëm për njerëzit që nuk vijnë në kishë. Duhet thënë që disa nga ata që shkojnë në kishë e përdorin më lehtë emrin e Zotit se ata që nuk vijnë. Unë njoh njerëz që nuk vijnë në kishë, por me emrin e Perëndisë nuk bëjnë shaka. E kur këta e nderojnë emrin e Zotit, si ka mundësi që ka besimtar me një standart me të ulët?

Ndoshta ti pyet, si duhet të veprohet kur një i afërm apo një koleg e përdor kot emrin e Zotit? Edhe pse nuk e ke obligim të korrigjosh tjetrin për çdo fjalë të gabuar që ai nxjerr nga goja, mund të gjesh momentin ta sfidosh për mënyrën se si e përdor kot emrin e Zotit. Një mënyrë e tillë mund të ishte duke i bërë një pyetje të tipit: “E ke bërë shok Zotin që e përdor emrin e tij ashtu?”

Në mbyllje: Ka njerëz që e kanë përdhosur emrin e Zotit kaq herë sa nuk numërohet. Mund të mendojnë që janë dikushi tani, por dita do të vijë kur do të trokasin te dera e Zotit, dhe ai do t’ju thotë: “Largohuni nga unë. Nuk ju njoh fare”.

Ndërsa ai që ka respekt e dashuri për emrin e Zotit le të ngushëllohet me faktin që emri i tij është shkruar në librin e jetës. Ai mund të mos ketë famë në këtë botë, por engjëjt e shqiptojnë emrin e tij në qiell. Nëqoftëse ti je i tillë, një ditë do të gjendesh mes asaj shoqërie engjëllore, ku emri i Zotit veçse adhurohet, e kurrkujt nuk i shkon në mendje ta përdori kot.

Most Popular

HALLOWEEN-I SHQIPTAR

Po t’i marrësh për bazë imazhet që përzgjedh media, të krijohet ideja se Halloween-i na qenka festa e horrorit! Edhe pse mbrëmjet...

12 SHENJA KUNDËR HOROSKOPIT

Kur vjen puna te horoskopi, ç’parashikime ka një gazetë nuk e ka tjetra. Të krijon një pikëpyetje apo jo?Shkenca nuk ka...

S’KA HAJDUT NË PARAJSË

Në çdo fshat, në çdo lagje, në çdo pallat, dhe në çdo ndërmarrje, ka njerëz që vjedhin. Disa i kryejnë vjedhjet me...

NJË ZË NGA QIELLI

Këto ditët e para të shkollës, dëgjova një mësues që ankohej që i ngjirej zëri, se duke dashur të dëgjohej përmes maskës,...

Recent Comments