A e dini që ka një konspiracion të madh? Që ekziston një komplot me përmasa botërore që prek jetën tënde? Bota është e mbushur me intriga, e dimë nga përvoja. Dhe kur keni hasur intriga në marrëdhëniet tuaja personale, nuk është e vështirë të imagjinosh që ka të tilla veprime në nivelet më të larta të biznesit apo të pushtetit. Në fakt, aty ku ka njerëz, ka dhe intriga.

Ndërsa kohët e fundit, për shkak të pandemisë (apo për shkak të masave që janë marrë për të përballuar përhapjen e koronavirusit), po qarkullojnë lajme të shumta që në prapaskenë po veprojnë forca të errëta në dëm të njerëzimit. Bëhet fjalë për intriga kaq të mëdha, sa ato formojnë një konspiracion mbarëbotëror.

Këtu lind pyetja: A ka vërtet një elitë botërore që kërkon të imponojë vullnetin e saj mbi njerëzimin?

Së pari, duhet pohuar që ka pasur tentativa reale në të shkuarën për të imponuar një rend botëror, siç ishte fashizmi, siç ishte marksizmi. Dihet që këto ishin lëvizje ideologjike që synuan marrjen e pushtetit dhe ia arritën qëllimit në një numër të madh shtetesh, duke shkaktuar jo pak luftëra e viktima.

Por duhet të konstatojmë që bota nuk ka vetëm një elitë. Ka ‘elita’, e thënë në shumës. Dhe elitat e botës nuk janë homogjene. Ka rivalitet të theskuar midis tyre, pa qenë e nevojshme të harxhojmë kohën duke i krahasuar agjendat e tyre, që shpeshherë janë totalisht kontradiktore me njëra tjetrën.

Por ngelet për të pyetur përsëri: Mos ndoshta ka një forcë të fshehtë që është akoma më e lartë sesa këto elita?

Po ju them hapur, që gjurmët për një komplot njerëzor në një rang botëror, nuk janë aspak bindëse. Por vini re që ju thashë, ‘gjurmët e një komploti njerëzor’. Sepse mund t’ju them me siguri që ka një komplot, botëror madje, por ai ekziston në një nivel krejt tjetër.

Këtu duhet urtësi. Sepse ato gjëra që janë të fshehta për syrin njerëzor, nuk i fshihen syrit hyjnor. Pavarësisht nëse i pranoni ose jo, Bibla na zbulon disa të vërteta të domosdoshme për të kuptuar çfarë po ndodh në botën tonë. Në Shkrimet e Shenjta, thuhet:

“Sepse ne nuk luftojmë kundër njerëzve prej mishi e gjaku, por kundër autoriteteve, kundër pushteteve, kundër sunduesve të kësaj bote të errët, kundër shpirtrave të këqij në botën frymërore”.

Kjo është e vërteta e Perëndisë.

Këta që kërkojnë për një konspiracion mbarëbotëror, po e kërkojnë në vendin e gabuar e te personat e gabuar, ndaj nuk arrijnë të zënë në faj keqbërësin e vërtetë.

Miq! Panorama biblike na sqaron shumë gjëra. Në radhë të parë na ndihmon të kuptojmë që bota ka një dimension frymëror. Kjo shpjegon përse ata që dyshojnë për një komplot në nivele më të larta kanë mbledhur vetëm disa pjesë të puzzle-it, por nuk i përshtasin dot me njëra-tjetrën. Sepse kemi të bëjmë, në fund të fundit, me një konspiracion djallëzor.

Kur flasim për prapaskenën e botës, domethënë për ekzistencën e forcave frymërore, hasim menjëherë dy reagime krejt të gabuara.

Reagimi i parë vjen prej atyre njerëzve që kanë një bindje që gjithçka që ekziston përbëhet vetëm nga ato gjëra që janë të dukshme dhe që mund të shpjegohen me ligjet e natyrës. Madje, atyre u duket qesharake të flasësh për ekzistencën e frymërave, qoftë të djajve apo të engjëjve. Ata nuk besojnë në ekzistencën e botës shpirtërore. E quajnë absurditet. I kanë mbyllur sytë në këtë drejtim. Por është gabim të përjashtosh realitete frymërore, pa i marrë në konsideratë evidencat për personifikimin e së mirës dhe të së keqes. Kësaj i thonë ta paragjykosh çështjen. Besoj që i Ligu është më se i kënaqur, kur njerëzit mohojnë ekzistencën e tij. Se kështu i ka punët më të lehta për t’i mbuluar gjurmët.

Vjen pastaj një reagim tjetër, i gabuar gjithashtu, por plotësisht ndryshe nga reagimi i mësipërm. Ka një grup njerëzish që reagojnë ndaj idesë se ka një botë shpirtërore në mënyrë krejt të ekzagjeruar. Janë persona që kanë një imagjinatë të shfrenuar dhe fillojnë të shikojnë djajtë kudo. Këta posedojnë një lloj supersticioziteti që feja e mirëfilltë nuk e pranon. Me keqardhje duhet thënë që njoh edhe besimtarë që bien pre e një mentaliteti të tillë të gabuar. Ata kanë hyrë në një udhë pa krye, ku në vend qe të besojnë fort Zotin e të jetojnë me kurajo e shpresë në të, më shumë kanë frikë nga armiku. Por Perëndia nuk na ka dhënë frymë frike, por force, dashurie dhe urtësie. Ndërsa i Ligu, kërkon se si t’i futë njerëzit në grackën e frikës së pafundme, për t’i mbajtur mendjet e tyre larg shpëtimit.

Fjala që ne “nuk luftojmë kundër mishit e gjakut, por … kundër shpirtrave të këqij në sferën frymëore”, nuk u shkrua për të na trembur, por për të na qartësuar se çfarë po ndodh në këtë botë, madje edhe në rrethin tonë personal.

Apostulli Pal, një shërbëtor i denjë i Perëndisë, ai që i hartoi këto fjalë, nuk po thoshte që ne nuk kemi konflikte me njerëzit. Përkundrazi, ai sapo kishte përshkruar gjithë ato lloje të konflikteve që përjetojmë, si në shoqëri, në punë dhe në gjirin e familjes. Pasi përshkruan këto, ai kërkonte të vinte në dukje një të vërtetë të vyer: që ne nuk kemi probleme në marrëdhëniet njerëzore thjesht sepse nuk dimë të merremi vesh, por sepse në prapaskenë vepron një forcë e ligë që kërkon të amplifikojë pikërisht ato mosmarrëveshje.

Shpjegimi që: “Nuk luftojmë kundër mishit e gjakut, por … kundër shpirtrave të këqij” u dha për të na bërë syçelët, që të mos i lëmë hapësirë djallit të na shfrytëzojë duke na armiqësuar me njëri-tjetrin.

Atëherë, cila duhet të jetë reagimi ynë? Është e qartë dhe e thjeshtë: Të vëmë besimin te Zoti e të kërkojmë forcën e tij në jetën tonë. Nuk duhet të çuditemi me marifetet që përdor i ligu. Duhet të çuditemi me veten tonë, që harrojmë se jemi pjesë e luftës shpirtërore edhe që e lejojmë armikun të na pushtojë mendjet tona me frikë e shqetësime të ndryshme, në vend që të shkojmë te Krishti, i cili është burimi i paqes, dashurisë dhe durimit.

I kthehemi konspiracionit të madh. Kjo e vërtetë që “Nuk luftojmë kundër mishit e gjakut..” vlen për të kuptuar gjithçka që po ndodh më gjerësisht në botë.

Por një paralajmërim: Kini kujdes nga gjykimi i cekët! Ashtu sikur Zoti nuk është në anën e një kombi, e një shteti, apo s’është palë e një organizate politike apo institucioni fetar të veçantë, as djalli nuk bën shumë dallim. I ligu mban anën e tij, dhe të askujt tjetër. Nuk i shërben askujt, por i përdor të gjitha për të prodhuar sa më shumë ligësi dhe mosbesim ndaj Zotit.

Strategjia e tij është e njohur: ‘përça e sundo’. A ka dy anë të një konflikti? I ligu luan të dy anët kundër njëra-tjetrës. Ka tre ose katër palë të përfshirë në një mosmarrëveshje? Përsëri i ligu i luan të gjithë kundër të gjithëve. Ai është mjeshtër për këtë. Dhe veçse kërkon të përçojë te njeriu një frymë rebelimi, një frymë urrejtje, një frymë smire, një frymë lakmie, një frymë pangopësie, një frymë mendjemadhësie… me një fjalë, një frymë të ndyrë e një frymë djallëzore.

Për të arritur këtë sa më kollaj, ai kërkon të ndikojë sa më shumë në botën mediatike, në qarqet intelektuale, në partitë politike, dhe në institucionet e ndryshme, qofshin ato shtetërore apo joshtetërore. Këto të gjitha mund të jenë të ngritura për qëllime fisnike, por i ligu kërkon t’i rrëmbejë nga brenda për qëllimet e veta. Ky është konspiracioni botëror!

Prandaj, jo më kot, Bibla thotë: “Sepse ne nuk luftojmë kundër njerëzve prej mishi e gjaku, por… kundër sunduesve të kësaj bote të errët, kundër shpirtrave të këqij në botën frymërore”.

Kjo nuk është e gjitha. Sepse te njeriu mëkatar i ligu gjen një bashkëpunëtor të gatshëm. E merr kalanë nga brenda, duke përdorur pasionet e ulta të njerëzve për t’i çuar atje ku do ai. Fakti që njeriu është i pavetëdijshëm që po e vënë në lojë është pjesë e suksesit të Satanit.

Nuk e shikon që Bibla ka të drejtë? Nuk e shikon natyrën e vërtetë të problemeve në këtë botë?

Madje, edhe idenë e konspiracionit botëror (e përfolur kaq shumë gjatë ditëve të fundit) i ligu e përdor për qëllimet e veta, për të nxitur frikë e urrejtje. Sepse ai hedh tym, e dëshiron të krijojë sa më shumë rrëmujë, në mënyrë që të mos kuptohet kush është armiku ynë i vërtetë.

Taktika e tij quhet “Hedh gurin, fsheh dorën” dhe ai është mjeshtër në manipulimin e njerëzve. Ai përdor mijëra gojë të liga për të hedhur në qarkullim qindra gënjeshtra. Kur njeriu e lë mënjanë dritën e Fjalës së Perëndisë, s’është për t’u habitur që i ligu ia bën mendjen errësirë.

Ka një komplot me përmasa botërore! Por nuk është ajo që mendojnë njerëzit në përgjithësi. Është një luftë shpirtërore midis së mirës dhe së keqes.

Thua që i intereson djallit se kush e zë karrigen e kush jo? Atij i intereson vetëm të prishë njerëzit sa më shumë, për t’i përdorur pastaj në luftën kundër njëri-tjetrit, e kundër Zotit, duke i helmuar sa më shumë mendjen, duke ndotur sa më shumë ndërgjegjen, e duke vjedhur besimin e shpresën; të ligësojë sa më shumë shpirtra.

Ka një konspiracion të madh! Është i vjetër sa njerëzimi. Që kur gjarpri e futi në grackë njeriun e parë duke ia mbushur mendjen që të mos i vinte veshin fjalës së Zotit, por të dëgjonte zërin e tij mashtrues.

Ka një konspiracion të madh! Dashur pa dashur, secili prej jush është përfshirë në të. Sepse ky komplot me përmasa botërore, ka ndikim në çdo vend. Luhet për fatin e miliona shpirtrave. Luhet edhe për fatin e shpirtit tënd dhe të atyre që janë të dashur për ty. A të ka vënë në lojë i ligu? A të ka mashtruar? A je i sigurtë që jo?

Ka një konspiracion të madh! Një komplot që ka pasoja serioze. Mos jini të paditur, e mos ndiqni mite për një organizatë njerëzore, të fshehtë në paskenë. Jo! Nënshtrojuni Perëndisë, ndërsa djallin kundërshtojeni!

Ka një konspiracion të madh! Prandaj përqafoni planin e shpëtimit që u zbulua në Jezus Krishtin. Sepse ti nuk je pjesë e një eksperimenti, siç thonë disa. Je rob i Zotit, por i kapur peng prej mëkatit. A nuk ka ardhur koha të çlirohesh, të të hapen sytë e t’ia drejtosh lutjen tënde Krishtit?

Fjala e Perëndisë sot është kjo: “nuk luftojmë kundër mishit e gjakut, por kundër… shpirtrave të këqij në botën frymërore”.

Në anën e kujt je? Gjithë ndasitë e tjera midis njerëzve janë vetëm për të na ngatërruar. Çështja është kjo: A je me Zotin?

O mik, mos më thuaj, ‘jemi të gjithë me Zotin’. Sepse s’është e vërtetë. Shumë e kanë shitur shpirtin e tyre, e sot janë bërë duar, dhe këmbë, edhe gojë e të ligut.

A nuk e dini përse erdhi Krishti në botë? Për të luftuar Satanin. E për të prishur konspiracionin e tij. Prandaj bota nuk sundohet më prej paganizmit të mbrapshtë djallëzor si dikur.

Gjarpri mund ta ketë shpuar Jezusin në dorë e në këmbë, por Krishti i dha atij një goditje në kokë. Sepse plani i Perëndisë ishte më i lartë sesa ai i djallit. Jezusi i fshiu mëkatet e botës me gjakun e tij dhe u ngjall fitimtar. Por lufta nuk ka mbaruar ende. Djalli kërkon përsëri të fitojë terren sa më shumë me marifetet e tij të shumëllojshme. Kohën e ka të kufizuar dhe fundin të sigurt, por nuk po diskutojmë fatin e tij. Po diskutohet fati yt.

Ka një konspiracion të madh! Shumë janë të mashtruar, të tjere janë mashtrues, por Krishti i ka dhënë një rrugëdalje kujtdo që pendohet, duke e shpëtuar prej mashtrimit të mëkatit.